<figure class="op-ad"> <iframe width="320" height="50" style="border:0; margin:0;" src="https:
//www.facebook.com/adnw_request?placement=1321318954578957_1321318967912289&
adtype=banner320x50"></iframe> </figure>
ថ្ងៃចន្ទ ទី៧ ខែវិច្ឆិកា ឆ្នាំ២០១៦ ម៉ោង ០៩:៤០ (07-11-2016 09:40)
លោក ចេវ ផល ប្រធានការិយាល័យបរិស្ថាននៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិបានឱ្យដឹងនៅរសៀលថ្ងៃទី៦ ខែវិច្ឆិកានេះ ថា ដើមគ្រញូងខាងលើ ត្រូវបានជនខិលខូចលួចអារកាត់តាំងពីយប់ថ្ងៃទី៤ វិច្ឆិកា តែមិនទាន់ដួលរលំទេ ។ លុះនៅរសៀលថ្ងៃទី៥ ខែតុលា លោកបានទទួលដំណឹងតាមរយៈលោកមេភូមិនគរក្រៅថា មានករណីលួចអារកាត់ដើមគ្រញូងនៅទីតាំងខាងលើ ទើបក្រុមការងាររបស់លោក បានទៅពិនិត្យដល់ទីតាំងផ្ទាល់ ហើយបានឃើញថា ដើមគ្រញូងនេះ ត្រូវបានជនខិលខូចលួចកាត់មែន នៅសល់តែប្រមាណ២តឹកទៀតប៉ុណ្ណោះ ហើយជនខិលខូចបានយកស្លឹកឈើញាត់ក្នុងប្រហោងដែលអារ ព្រមទាំងលាបភក់បិទពីខាងក្រៅទៀតផង ។
ដោយពិនិត្យឃើញថា ដើមគ្រញូងនេះច្បាស់ជានឹងដួលរលំបង្កគ្រោះថ្នាក់ដល់អ្នកធ្វើដំណើរឆ្លងកាត់ ឬចូលជ្រក និងដើម្បីយកដើមគ្រញូងនេះមករក្សាទុក ជៀសវាងជនខិលខូចលួចកាត់បន្តនៅពេលយប់ ក្រុមការងាររបស់លោក បានរាយការណ៍ជូនថ្នាក់ដឹកនាំនៃអាជ្ញាធរជាតិអប្សរាដើម្បីចាត់វិធានការជាបន្ទាន់ ។ ក្រោយទទួលបានអនុសាសន៍ពីថ្នាក់ដឹកនាំ ទើបនៅព្រឹកថ្ងៃទី៦ វិច្ឆិកា ក្រុមការងាររបស់លោកបានផ្តួលរំលំដើមគ្រញូងនោះតែម្តង ដោយមានប្រជាការពារភូមិនៅចាំមើលជាមួយដែរ ។
លោក ផល បន្តថា គ្រាន់តែក្រុមការងារផ្តួលហើយភ្លាម បម្រុងនឹងដឹកយកទៅរក្សាទុកស្រាប់តែប្រជាពលរដ្ឋមួយក្រុម បានមកតវ៉ានិងហាមឃាត់មិនឱ្យដឹកចេញ ហើយបែរជាចោទប្រកាន់ក្រុមការងាររបស់លោកថា ជាអ្នកកាប់បំផ្លាញទៅវិញ ទោះជាក្រុមប្រឹក្សាសង្កាត់ មេភូមិនគរក្រៅ និងក្រុមការងារលោកពន្យល់សម្របសម្រួលយ៉ាងណា ក៏មិនព្រមស្តាប់ដែរ ។ ឃើញដូច្នេះ ក្រុមការងាររបស់លោកសម្រេចធ្វើលិខិត ប្រគល់ដើមគ្រញូងនេះជូនអាជ្ញាធរភូមិឃុំ ដើម្បីរក្សាទុក និងសម្របសម្រួលជាមួយប្រជាពលរដ្ឋជាមុនសិន ។
លោក មីក រឹទ្ធ មេភូមិនគរក្រៅបានឱ្យដឹងថា នៅថ្ងៃទី៦ ខែវិច្ឆិកា នៅប៉ុស្តិ៍រដ្ឋបាល ភូមិមួយ បុរសម្នាក់ដែលបានទៅស្ទូចត្រីនៅមាត់កសិន្ធុ បានឃើញស្នាមអារដើមគ្រញូងខាងលើ ក៏បានទូរស័ព្ទមកប្រាប់លោក ។ លោកក៏បានទៅពិនិត្យមើលឃើញជាក់ស្តែងក៏បានរាយការណ៍ទៅក្រុមប្រឹក្សាសង្កាត់គោកចក និងរាយការណ៍ទៅក្រុមការងារព្រៃឈើនៃអាជ្ញាធរជាតិអប្សរា ដើម្បីចាត់វិធានការយ៉ាងណាកុំឲ្យមានគ្រោះថ្នាក់ ។
ចំពោះករណីប្រជាពលរដ្ឋមកតវ៉ា លោកមេភូមិរៀបរាប់ថា មុននឹងផ្តួលដើមគ្រញូងនេះ លោកក៏បានប្រាប់ដល់ប្រជាពលរដ្ឋដឹងមុនខ្លះដែរ តែមិនបានទាំងអស់គ្នាទេ ។ លុះពេលផ្តួលដួលហើយ ក៏ស្រាប់តែមានប្រជាជនប្រមាណជា៩នាក់ មកស្រែកតវ៉ាហាមឃាត់មិនឱ្យដឹកចេញ។ នៅព្រឹកថ្ងៃទី៦ វិច្ឆិកានេះ លោកបានពន្យល់ និងសម្របសម្រួលជាមួយប្រជាពលរដ្ឋទាំងនោះម្តងហើយ តែពួកគាត់នៅតែមិនព្រមដដែល ។ លោកនឹងសហការជាមួយក្រុមប្រឹក្សាសង្កាត់ដើម្បីធ្វើការងារនេះបន្តទៀត ហើយលោកនឹងចាត់ក្រុមប្រជាការពារភូមិដើម្បីយាមដើមគ្រញូងនេះ មិនឲ្យមានជនខិលខូចមកលួចដឹកចេញនៅពេលយប់ ។
លោក និន ចាន់សាមៀន ប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌និងបរិស្ថាននៃអាជ្ញាធរជាតិអប្សរា មានប្រសាសន៍ថា ឥឡូវនេះក្រុមការងាររបស់លោកកំពុងធ្វើការជាមួយឧទ្យាននុរក្សនៃក្រសួងបរិស្ថាន ដើម្បីកំណត់អត្តសញ្ញាណជនល្មើស និងឈានទៅចាត់វិធានការផ្លូវច្បាប់ ។
- លោក ឃឹម ប៊ុនសុង បញ្ជាឱ្យវែកមុខអ្នកកាប់ដើមគ្រញូង
នៅវេលាម៉ោង ១៧ នឹង ២៥ នាទីល្ងាចថ្ងៃទី ០៦ វិច្ឆិកា នេះលោកអភិបាលខេត្តបានថ្លែងប្រាប់តាមទូរសព្ទ័ថា «ខ្ញុំ មិនអត់ឪនឲ្យជនខិលខូចទេ ខ្ញុំកំពុងបញ្ជាឲ្យ មន្ត្រីជំនាញ (បរិស្ថាន និងមេព្រៃ) តាមស៊ើប អង្កេតឲ្យឃើញអ្នកណាខ្លះជាអ្នកពាក់ពន្ធ័ក្នុងអំពើលួចកាប់ដើមគ្រញូងដ៏គឃ្លើនហ្នឹង ដើម្បីមានចំណាត់ការតាមផ្លូវច្បាប់» ។
ប្រជាការពារភូមិមួយរូបគឺលោក ម៉ោង សុខុន ដែលបានចូលរួមរារាំងមន្ត្រីអាជ្ញាធរអប្សរាដែលប៉ុនប៉ងលើកឈើគ្រញូង នោះចេញពីទីដែលត្រូវផ្លួលបានអះអាងថា ៖ កាលពីវេលាម៉ោងប្រមាណ៥ល្ងាច ម្សិលម៉ិញក្រុមមន្ត្រីអាជ្ញាធរអប្សរាមានគ្នា ប្រមាណជិត២០នាក់បានធ្វើការបិទកំណាត់ផ្លូវក្រហមនេះ ដើម្បីរក្សាការសម្ងាត់ ក្នុងការអាររំលំដើមក្រញូងហ្នឹង ក្នុងបំណងដឹក ចេញតាមឡានស្ទួចមួយគ្រឿងទាំងយប់ប៉ុន្តែរណាយន្តពួកគេខូចត្រូវពន្យារពេលដល់ព្រឹកឡើង ទើបប្រជាពលរដ្ឋដឹងក៏លើកគ្នាប្រមាណ៦០ នាក់ទៅរារាំងតែម្តង ។
No comments:
Post a Comment